قد تبدو الحكاية ساذجة للغاية و مع ذلك قد تبدو عميقة أيضاً
الأب مُحدثاً الأولاد و هو في قمة السعادة:
" أنا حجزت مصيف في إسكندرية زي كل سنة و حنسافر الجمعة الجاية ف كل واحد يحضر حاجاته."
الأولاد في حالة من عدم الرضا، فيجيب الأبن:
"أنا مش عايز أسافر يا بابا"
الأب في حنان مفتعل:
"ليه كده يا حبيبي مش ده المصيف اللي بنطلعه كل سنة من أيام جدو و تيته"
الأبن:
"ما هو يا بابا ده ملل أوي الصراحة و مفيش تجديد كل مرة بنسافر نعمل نفس الحاجات من أيام جدو و تيتة"
الأب في إستنكار:
"طب ما أنا زيك بعمل نفس الحاجة و مش زهقان، بالعكس أنا بنبسط جداً بالسفرية دي"
الأبن:
"لا يا بابا في أماكن كتير طلعت جديدة و سافرتها مع صُحابي و بتبقى حلوه أوي، ما تيجي نجرب مكان تاني صدقني يا بابا ح تستمع أكتر و كلنا ح ننبسط، و نخرج بقى من فكرة المصيف اللي من أيام جدو و تيتة."
الأبنة:
"بصراحة يا بابا هو عنده حق و أنا كنت عايزه أقول كده برضه"
الأب في غيظ:
"هو في يا ولاد أحلا من حاجت زمان و روقان زمان، أنت عايزني أروح الأماكن اللي أنت بتروحها مع صحابك الخايبين دول، أبوك عمره ما عملها و لا حيعملها"
الأبن في هدوء:
"طيب خلاص سافر أنت و ماما و أنا حقعد هنا"
الأم في إندفاع:
"تقعد لوحدك!؟"
الأبنة في إندفاع مماثل للأم:
"لأ ما أنا حقعد معاه عشان مش حبقى لوحدي معاكو"
الأبن في نفس الهدوء:
"أنا حبقى مع صحابي أخرج معاهم و أنبسط"
الأب في حزم:
"بقولكوا أيه أنتوا حتيجوا المصيف يعني حتيجوا المصيف و ده أخر كلام عندي"
الأم في إنفعال:
"أيوه لازم تيجوا"
الأبن:
"على فكرة مش لازم نيجي و إحنا مش عايزين نيجي خلاص، حنيجي بالعافية يعني!؟"
الأب و هو أكثر غيظاً:
"لو ماجتوش حخصم من كل واحد فيكوا خمسمية جنية من مصروفة الشهري"
الأبن في هدوء:
"ماشي إخصم، الفكرة مش في الفلوس، أنا مش عايز أروح"
الأب في عصبية:
"طيييب مفيش خروج و حتتحبسوا في البيت"
الأبن:
"تفتكر ده ح يحل الموضوع أو ح يخليني أوافق إني أسافر بالعكس بقى"
صمت دام لمدة قد تبدو طويلة و لكنها مجرد ثواني و أردف الأب:
"طيب بصوا أنا حديكوا يوم كمان تفكروا فيه جايز تغيروا رأيكوا"
ثم غادر الأب الجلسة و نظرت الأم لكليهما و قالت:
"كده....كده نكدتوا علينا السفرية اللي كنا عايزين نسافرها، منظرنا أيه دلوقتي قدام خلاتكم و عماتكم لما نروح أنا و أبوكوا بس، الناس تقول علينا أيه معندناش عيال نتسند عليهم، كل واحد فيكوا بيفكر في نفسه و بس، محدش فكر في منظرنا، منكوا لله خربتو السفرية "
و تغادر الأم في تأفأف، و بقي الأبن و الأبنة و هما ينظران لبعضهما و تعلو كل واحد منهما بسمة.
المنظومة التي أنجبت هذا الأب هي نفس المنظومة القائمة و التي تتعامل من نفس المنطلق، و مع كل التغيرات التي حدثت إلا أن نفس الأسلوب مازال قائم.
ليست هناك تعليقات:
إرسال تعليق